ការសិក្សាថ្មី៖ វីរុសកូវីដ១៩ អាចតោងជាប់ក្នុងច្រមុះកុមាររហូតដល់៣សប្ដាហ៍ ដោយមិនចេញរោគសញ្ញា
យោងតាមការសិក្សាមួយពីប្រទេសកូរ៉េខាងត្បូងចេញផ្សាយនៅថ្ងៃសៅរ៍បានឱ្យដឹងថា កុមារអាចផ្ទុកវីរុសកូរ៉ូណាថ្មីឬកូវីដ១៩នៅក្នុងច្រមុះរបស់ពួកគេរហូតដល់៣សប្តាហ៍ ខណៈការសិក្សាមុនៗ ក៏បានរកឃើញថា ភាគច្រើននៃកុមារដែលមានវីរុសនេះ មានរោគសញ្ញាស្រាលឬមិនចេញរោគសញ្ញា។
ការរកឃើញទាំងនេះបានជួយបំភ្លឺអំពីពីសំណួរដែលមិនទាន់ដឹងចម្លើយ ថាតើកុមារទំនងជាចម្លងវីរុសទៅអ្នកដទៃដោយរបៀបណា។ ការសិក្សាថ្មីនេះ បានសង្កត់ធ្ងន់ទៅលើតួនាទីបន្តនៃរក្សាគន្លាតសុវត្ថិភាព និងធ្វើអនាម័យឱ្យបានល្អ នៅពេលកុមារត្រឡប់ចូលរៀនក្នុងសាលារៀនឡើងវិញនៅក្នុងបរិបទកូវីដ។
ប្រធានសាកលវិទ្យាល័យខាងពេទ្យកុមារនិងសុខភាពកុមារនៅប្រទេសកូរ៉េខាងត្បូង លោកសាស្រ្តាចារ្យ Russell Viner បានពន្យល់ថា មានសំណួរចំនួនបីដាច់ដោយឡែកពីគ្នាអំពីកុមារនិងជំងឺឆ្លងកូវីដ១៩ គឺទី១ កុមារឆ្លងជំងឺនេះទេ ទី២ តើធ្ងន់ធ្ងរប៉ុណ្ណាសម្រាប់កុមារដែលឆ្លងវីរុសនេះ និងទី៣ ថាតើពួកគេចម្លងវាទៅអ្នកដទៃដែរទេ។
លោកបន្តថា ឥឡូវគេដឹងច្បាស់ហើយថា កុមារអាចឆ្លងវីរុសនេះ ហើយលទ្ធផលធ្វើតេស្តឈាមអង្គបដិប្រាណបង្ហាញថា ពួកគេអាចងាយរងគ្រោះតិចជាងបើប្រៀបធៀបទៅមនុស្សធំក្នុងការឆ្លងជំងឺនេះ ជាពិសេសក្មេងអាយុក្រោម១២ឆ្នាំ។
ចំណែកអ្នកវិទ្យាសាស្ត្រ ក៏មានទំនុកចិត្តយ៉ាងមុតមាំថា កុមារទំនងជាធ្លាក់ខ្លួនឈឺតិចជាងមនុស្សធំ បើទោះបីពួកគេឆ្លងក៏ដោយ ហើយពួកគេជាច្រើនមិនបានបង្ហាញរោគសញ្ញាអ្វីទាំងអស់។ នេះបើតាមការសិក្សារបស់ប្រទេសអង់គ្លេសដែលបានចេញផ្សាយកាលពីថ្ងៃសុក្រទី២៨សីហា។
ការសិក្សារបស់ប្រទេសកូរ៉េខាងត្បូង បានផ្អែកលើកុមារ៩១នាក់ បានរកឃើញថា សូម្បីតែក្នុងចំណោមអ្នកដែលមានរោគសញ្ញាតិចតួចឬគ្មានរោគសញ្ញា វីរុសកូវីដ១៩ គឺអាចរកឃើញនៅក្នុងច្រមុះរបស់ពួកគេរហូតដល់៣សប្តាហ៍ក្រោយ ដែលសិក្សាសន្និដ្ឋានថា កុមារទាំងនោះ អាចចម្លងជំងឺទៅកាន់អ្នកផ្សេងទៀត៕
ប្រភព៖ ខ្មែរណាស់
