កាសែតកូរ៉េខាងជើងបង្ហាញពីធម្មយាត្រាទៅកាន់ភ្នំពែកឌូ ដើម្បីជម្នះឧបសគ្គផ្សេងៗ
ក្រុងសេអ៊ូល៖ កាសែតផ្លូវការរបស់កូរ៉េខាងជើងបានឲ្យដឹងកាលពីថ្ងៃចន្ទថា មនុស្សជាច្រើនបានធ្វើដំណើរឆ្លងកាត់អាកាសធាតុត្រជាក់ខ្លាំង ដើម្បីធ្វើធម្មយាត្រាមួយទៅកាន់ភ្នំពែកឌូកាលពីប៉ុន្មានខែថ្មីៗនេះ ដោយបានបន់ស្រន់ដល់វត្ថុស័ក្តិសិទ្ធិជួយកម្ចាត់ឧបសគ្គនានាមិនធ្លាប់មាន ដែលប្រទេសនេះកំពុងប្រឈម។
ភ្នំពែកឌូ ត្រូវបានស្គាល់ថា ជាកន្លែងកំណើតរបស់ឪពុករបស់លោក គីម ជុងអ៊ុន និងអតីតមេដឹកនាំលោក គីម ជុងអ៊ីល។ ភ្នំនេះ ក៏ត្រូវបានគេចាត់ទុកជាកន្លែងស័ក្តិសិទ្ធិមួយជាទីដែលជីតារបស់លោក គីម ជុងអ៊ុន និងស្ថាបនិកប្រទេសនេះ គឺលោក គីម អ៊ីលស៊ុង បានធ្វើការតស៊ូប្រឆាំងជប៉ុននៅក្នុងអំឡុងការគ្រប់គ្រងអាណានិគមពីឆ្នាំ ១៩១០-១៩៤៥។
នៅក្នុងអត្ថបទទំព័រមុខសារព័ត៌មាន Rodong Sinmun ជាកាសែតផ្លូវការរបស់គណបក្ស ដែលកំពុងគ្រប់គ្រងអំណាចនៅកូរ៉េខាងជើង បាននិយាយថា មនុស្សប្រហែល ៥០ ០០០ នាក់ បានទៅទស្សនាភ្នំពែកឌូ ចន្លោះខែធ្នូ និងខែកុម្ភៈ។ ធម្មយាត្រារបស់ពួកគេ មានគោលបំណងដោះស្រាយការលំបាក និងឧបសគ្គនានា ដែលមិនធ្លាប់មានពីមុនជាមួយនឹងស្មារតីបដិវត្តន៍។
សារព័ត៌មាននេះ បាននិយាយថា៖ «អ្វីដែលចាំបាច់នៅក្នុងរយៈពេលដ៏លំបាកនាពេលបច្ចុប្បន្ន គឺស្មារតីបដិវត្តន៍ដ៏ម៊ឺងម៉ាត់របស់ជនសេ្នហាជាតិដែលបានតស៊ូប្រឆាំងនឹងជប៉ុន និងភាពអង់អាចគ្មានគូប្រៀប»។ ខ្យល់អាកាសនៅភ្នំពែកឌូ គឺជាខ្យល់កក់ក្តៅដែលនាំមកនូវអ្វីដ៏អស្ចារ្យ និងជ័យជម្នះមកឲ្យក្រុមអ្នកធ្វើបដិវត្តន៍»។
កាសែតនោះមិនបានបញ្ជាក់ពីឧបសគ្គអ្វីខ្លះដែលប្រទេសនេះកំពុងប្រឈមនោះទេ ប៉ុន្តែហាក់បីដូចចង្អុលបង្ហាញពីទណ្ឌកម្មយ៉ាងធ្ងន់ធ្ងរ ដែលនៅជាធរមាន ស្របពេលការចរចាពីបញ្ហានុយក្លេអ៊ែរជាមួយក្រុងវ៉ាស៊ីនតោនជាប់គាំង៕
