ក្រុមឧទ្ទាមហ៊ូធីបង្កើនកិច្ចប្រតិបត្តិការយោធាប្រឆាំងតំបន់នានា ដែលគ្រប់គ្រងដោយរដ្ឋាភិបាល
ក្រុងអាដែន៖ ជនសកម្មប្រយុទ្ធហ៊ូធីនៅយេម៉ែនកាលថ្ងៃអង្គារបានបង្កើនកិច្ចប្រតិបត្តិការ និងធ្វើការវាយប្រហារទ្រង់ទ្រាយធំប្រឆាំងខេត្តម៉ារីប ដែលសម្បូរដោយប្រេងនោះ។
ការបង្កើនការវាយប្រហាររបស់យោធាប្រដាប់អាវុធ ត្រូវបានធ្វើឡើងដោយក្រុមឧទ្ទាមហ៊ូធីប្រឆាំងទីតាំងឈរជើងជាច្រើនរបស់កងកម្លាំងរដ្ឋាភិបាល នៅជាយក្រុងភាគខាងលិចនៃខេត្តម៉ារីប មានចម្ងាយ ១៧០ គីឡូម៉ែត្រភាគខាងកើតនៃក្រុងសាណារបស់ប្រទេស យេម៉ែន។
មន្ត្រីម្នាក់នៃកងកម្លាំងរដ្ឋាភិបាលបានថ្លែងប្រាប់សារព័ត៌មានស៊ីនហួក្នុងលក្ខខណ្ឌអនាមិកថា ការប្រយុទ្ធគ្នាយ៉ាងស្វិតស្វាញកំពុងកើតឡើងរវាងកងកម្លាំងជាតិ និងក្រុមឧទ្ទាមហ៊ូធីដែលកំពុងប៉ុនប៉ងឈ្លានពានយកខេត្តម៉ារីប ដែលសម្បូរដោយប្រេងពីភាគីផ្សេងៗ។
លោកបានថ្លែងថា អាវុធជាច្រើនប្រភេទនៅក្នុងនោះមានកាំភ្លើងធំដែរ ត្រូវបានប្រើប្រាស់រវាងសត្រូវសង្គ្រាមទាំង ២ នៅក្នុងការប្រយុទ្ធគ្នា ដើម្បីដណ្តើមគ្រប់គ្រងមូលដ្ឋានកងទ័ពរបស់រដ្ឋាភិបាលនៅជាយក្រុងម៉ារីប។
យន្តហោះចម្បាំងជាច្រើនគ្រឿងរបស់ក្រុមចម្រុះដឹកនាំដោយអារ៉ាប៊ី សាអ៊ូឌីត បានបើកការវាយប្រហារផ្លូវអាកាសជាបន្តបន្ទាប់ នៅក្នុងកិច្ចប្រឹងប្រែង ដើម្បីគាំទ្រកងកម្លាំងរដ្ឋាភិបាល និងទប់ទល់នឹងការវាយប្រហារយ៉ាងខ្លាំងក្លារបស់ក្រុមឧទ្ទាមហ៊ូធី។
សមាជិកនៃកងកម្លាំងសន្តិសុខត្រួតពិនិត្យអ្នកជិះម៉ូតូជាផ្នែកនៃការរឹតបន្តឹងសន្តិសុខ។AFP
សាក្សីឃើញផ្ទាល់ភ្នែកបានថ្លែងប្រាប់សារព័ត៌មានស៊ីនហួថា ទ័ពជំនួយរបស់កងកម្លាំងរដ្ឋាភិបាល និងជនសកម្មប្រយុទ្ធជនជាតិដើម ត្រូវបានគេឃើញជិះរថយន្តយោធាចេញពីក្រុងម៉ារីប ឆ្ពោះទៅស្រុកស៊ីវ៉ាហ៍ ជាទីដែលការប្រយុទ្ធគ្នាកំពុងកើតឡើងជាមួយក្រុមឧទ្ទាមហ៊ូធី។
ប្រព័ន្ធផ្សព្វផ្សាយដែលមានទំនាក់ទំនងជាមួយកងកម្លាំងរដ្ឋាភិបាលបាននិយាយថា យុទ្ធជនហ៊ូធីជិត ៨០ នាក់ បានស្លាប់នៅក្នុងការវាយប្រហារដែលកំពុងកើតឡើងនៅក្នុងខេត្តម៉ារីបនេះ។
ទោះបីជាយ៉ាងណាក៏ដោយ ក៏គា្មនព័ត៌មានណាមួយត្រូវបានផ្តល់ឲ្យអំពីចំនួនអ្នកស្លាប់ និងរបួសនៅក្នុងចំណោមទាហានរបស់រដ្ឋាភិបាលនៅក្នុងអំឡុងការប្រយុទ្ធគ្នាជាមួយក្រុមឧទ្ទាមហ៊ូធីនៅក្នុងខេត្តម៉ារីបនោះទេ។
ក្រុមឧទ្ទាមហ៊ូធីបានបង្កើនកិច្ចប្រតិបត្តិការយោធារបស់ពួកគេប្រឆាំងនឹងខេត្តម៉ារីប ដែលសម្បូរដោយប្រេងត្រឹមតែប៉ុន្មានសប្តាហ៍ ក្រោយពីកាន់កាប់តំបន់ជាច្រើននៅក្នុងខេត្តអាល់ចាហ្វភាគខាងជើង ដែលមានព្រំដែនជាមួយនឹងអារ៉ាប៊ី សាអ៊ូឌីត៕
អត្ថបទ៖ https://www.postkhmer.com/
