ខ្លាំងមែន! ត្រឹមពេល ១០ថ្ងៃ ចិនសង់មន្ទីរពេទ្យបានសម្រេច ទុកដាក់អ្នកជំងឺកូរ៉ូណាវីរុស

3rd February 2020 hongkie ព័ត៌មានអន្តរជាតិ

កាលពីថ្ងៃទី ២៣ខែមករាកន្លងទៅ រដ្ឋាភិបាលបានចាប់ផ្ដើមសាងសង់មន្ទីរពេទ្យថ្មីសម្រាប់ដាក់អ្នកឆ្លងវីរុសកូរ៉ូណា ខណៈដែលអ្នកស្លាប់ និងអ្នកឆ្លងកើនឡើងជាបន្ដបន្ទាប់។

មន្ទីរពេទ្យថ្មីឈ្មោះថា Huoshenshan ត្រូវបានសាងសង់ឡើងត្រឹមរយៈពេល ១០ថ្ងៃប៉ុណ្ណោះនៅក្នុងទីក្រុង Wuhan ដោយប្រើប្រាស់គ្រឿងចក្រច្រើនគ្រឿង និងកម្មកររាប់ពាន់នាក់ធ្វើការទាំងយប់ទាំងថ្ងៃ។ មន្ទីរពេទ្យទំហំ ២៥ ០០០ ម៉ែត្រការ៉េនឹងអាចទទួលអ្នកជំងឺបាន ១ ពាន់នាក់ ដោយមានគ្រែចំនួន ១ ពាន់។ បុគ្គលិកពេទ្យចំនួន ១ ៤០០នាក់ ត្រូវបានបញ្ជូនទៅកាន់មន្ទីរពេទ្យថ្មីនេះ ដើម្បីព្យាបាលអ្នកជំងឺឆ្លងកូរ៉ូណាវីរុស។

គួរឲ្យដឹងថា កាលពីឆ្នាំ ២០០៣កន្លងទៅ អាជ្ញាធរចិនក៏ធ្លាប់សាងសង់មន្ទីរពេទ្យមួយឈ្មោះថា Xiaotangshan ក្នុងទីក្រុងប៉េកាំងផងដែរ ដោយចំណាយពេលត្រឹម ៧ថ្ងៃប៉ុណ្ណោះដើម្បីជាការឆ្លើយតបនឹងការឆ្លងជំងឺ SARS។ មន្ទីរពេទ្យនេះ បានទទួលព្យាបាលអ្នកជំងឺ ១/៧ ក្នុងចំណោមអ្នកឆ្លងជំងឺទាំងអស់ក្នុងប្រទេសកាលពីឆ្នាំនោះ៕