ឃាត់ខ្លួនជនសង្ស័យម្នាក់ ក្នុងចំណោមបក្សពួក៤នាក់ បញ្ជូនទៅតុលាការ ក្រោយកាប់ពលរដ្ឋម្នាក់បណ្តាលឲ្យរបួសធ្ងន់
បន្ទាយមានជ័យ: អនុវត្តន៍តាមការណែនាំ និង បទបញ្ជាពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ កម្លាំងនគរបាលការិយាល័យព្រហ្មទណ្ឌកម្រិតស្រាល សហការជាមួយកម្លាំងអធិការដ្ឋាននគរបាលក្រុងសេរីសោភ័ណ បានសហការណ៍គ្នាឃាត់ខ្លួន ជនសង្ស័យ១នាក់ យកមកសួរនាំ កាលពីថ្ងៃទី២០ ខែមីនា ឆ្នាំ២០២៣ ពាក់ព័ន្ធករណីកាប់លើយុវជនម្នាក់បណ្ដាលរងរបួសធ្ងន់។
លោកវរសេនីយ៍ឯក ព្រហ្ម ប៊ុនធឿន នាយការិយាល័យនគរបាលព្រហ្មទណ្ឌកម្រិតស្រាល បាទឱ្យដឹងថា មានពលរដ្ឋរងគ្រោះម្នាក់ឈ្មោះ ពេញ នុរៈសត្យា ភេទប្រុស អាយុ ១៦ ឆ្នាំ រស់នៅ ភូមិតារាងបាល់ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ បានប្តឹងរាយការណ៍ថា៖ កាលពីថ្ងៃទី១៩ ខែមីនា ឆ្នាំ២០២៣ វេលាម៉ោង ១៩:៤០នាទី ឈ្មោះ ពេញ នុរៈសត្យា ភេទប្រុស និងឈ្មោះ បញ្ញា ភេទប្រុស អាយុ១៧ឆ្នាំ បាននាំគ្នាអង្គុយលេងនៅចំណុចផ្លូវលេខ៧ ស្ថិតនៅភូមិ-សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ស្រាប់តែមានជនសង្ស័យ០១ក្រុម មានគ្នា០៤នាក់ ជិះម៉ូតូ២គ្រឿង ម៉ាកហុងដាឌ្រីម បានធ្វើសកម្មភាពវាយ និងកាប់មកលើឈ្មោះ ពេញ នុរៈសត្យា ជាច្រើនដៃ (រងរបួសស្រាល) ចំណែកឈ្មោះ បញ្ញា ត្រូវជាច្រើនកំបិត (រងរបួសសម្រាកព្យាបាលនៅមន្ទីរពេទ្យ) ពេលធ្វើសកម្មភាពរួចជនសង្ស័យទាំងនោះបានជិះគេចខ្លួនបាត់។ ក្នុងចំណោមជនសង្ស័យ០៤នាក់នោះ ឈ្មោះ ពេញ នុរៈសត្យា ស្គាល់០២នាក់១.ឈ្មោះ ឆាលី ភេទប្រុស អាយុ១៧ឆ្នាំ ២.ឈ្មោះ ដេត ភេទប្រុស អាយុ១៧ឆ្នាំ។
នៅថ្ងៃទី២០ ខែមីនា ឆ្នាំ២០២៣ កម្លាំងជំនាញការិយាល័យព្រហ្មទណ្ឌកម្រិតស្រាល បានចុះស្រាវជ្រាវ និងបានហៅឈ្មោះ អុី សុខលី ភេទប្រុស អាយុ១៧ឆ្នាំ រស់នៅភូមិ-សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ មកសួរនាំនៅការិយាល័យជំនាញ ហើយបានឆ្លើយសារភាពថា ខ្លួន និងបក្ខពួក៣នាក់ទៀត ១.ឈ្មោះ លឺ ភេទប្រុស អាយុ១៩ឆ្នាំ ២.ឈ្មោះ ទី ភេទប្រុស អាយុ១៩ឆ្នាំ ទាំង២នាក់រស់នៅភូមិអរអំបិល ៣.មិនស្គាល់ឈ្មោះ ខ្លួនបានយកមួកសុវត្ថិភាពវាយទៅលើជនរងគ្រោះជាច្រើនមួក និងច្រើនដៃ ចំណែកឈ្មោះ លឺ ភេទប្រុស អាយុ១៩ឆ្នាំ ជាអ្នកកាន់កំបិត និងកាប់ទៅលើជនរងគ្រោះ។
បច្ចុប្បន្ន ជនសង្ស័យស្ថិតក្រោមការសួរនាំរបស់នគរបាលកម្រិតស្រាល សួរនាំនិងកសាងសំណុំរឿងបញ្ជូនទៅតុលាការចាត់ការបន្តតាមនីតិវិធី៕
