ជនសង័្សយម្នាក់ប្រើអំពើហិង្សាលើអ្នកជិតខាងបណ្តាលឱ្យរងរបួសត្រូវសមត្ថកិច្ចនគរបាលស្រុកមោងឫស្សី ឃាត់ខ្លួនអនុវត្តតាមច្បាប់
កាលពីថ្ងៃ អាទិត្យ ១៣រោចខែ បុស្សឆ្នាំឆ្លូវត្រីស័ក ព.ស.២៥៦៥ ត្រូវនឹងថ្ងៃទី៣០ ខែ មករា ឆ្នាំ ២០២២ វេលាម៉ោង១៩និង១៥នាទី នៅចំណុចក្រុមទី២ ភូមិឫស្សី២ ឃុំមោង ស្រុកមោងឫស្សី ខេត្តបាត់ដំបង មានករណីរំលោភលើលំនៅដ្ឋាន និងហិង្សាដោយចេតនាមួយបានកើតឡើងបង្កដោយជនសង្ស័យឈ្មោះវ៉ាត់ សុវឿត ហៅញូញ ភេទប្រុស អាយុ២៩ឆ្នាំ រស់នៅភូមិឫស្សី២ ឃុំមោង ស្រុកមោងឫស្សី បានបំពានលំនៅដ្ឋានដោយធាក់ទ្វាររបងនិងសម្រុកចូលក្នុងលំនៅដ្ឋានរបស់ជនរងគ្រោះឈ្មោះតំ តឿមភេទ ស្រី អាយុ៦៣ឆ្នាំ រស់នៅចំណុចកើតហេតុ ព្រមទាំងរករឿងនិងវាយទៅលើជនរងគ្រោះខាងលើបណ្ដាលឱ្យរងរបួសរលាត់ម្រាមដៃស្ដាំ និងប្រអប់ជើង (របួសស្រាល) ។
ចំពោះមូលហេតុដែលនាំទៅដល់ការបង្កហិង្សានេះ គឺដោយសារជនសង័្សយខាងលើបានប្រើប្រាស់គ្រឿងញៀន ជាហេតុនាំបង្កទៅជាករណីនេះកើតឡើង ។
អនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្ត បាត់ដំបង រួមនឹងយោបល់លោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទ័ណ្ឌ លោកវរសេនីយ៍ឯក ស គឹមឡុង អធិការនគរបាលស្រុកមោងឫស្សី បានដឹកនាំកម្លាំងផែ្នកជំនាញនៃអធិការដ្ឋាននគរបាលស្រុករួមនឹងកម្លាំងនគរបាលប៉ុស្តិ៍រដ្ឋបាលមោងបានរួមគ្នាជាមួយបានចុះទៅដល់កន្លែងកើតហេតុភ្លាមៗ និងបានធ្វើការឃាត់ខ្លួនជនសង្ស័យខាងលើមកកាន់អធិការដ្ឋាននគរបាលស្រុកមោងឫស្សី ដើម្បីចាត់ការតាមផ្លូវច្បាប់៕
