តើរដ្ឋគិតពន្ធ២០% លើចំណេញមូលធនយ៉ាងម៉េច? បើអចលនទ្រព្យមួយ មិនដឹងថ្លៃដើមច្បាស់នោះ !
តាមការបញ្ជាក់ពីលោកគង់ វិបុល គឺចាប់ពីដើមឆ្នាំ២០២១ទៅ អគ្គនាយកពន្ធដារ នឹងធ្វើការប្រមូលពន្ធលើចំណេញមូលធន ដែលការយកពន្ធប្រាក់ចំណេញលើអចលនទ្រព្យ និងពន្ធប្រាក់ចំណេញមូលធននេះ គឺមិនមែនជាពន្ធថ្មីដែលទើបបង្កើតឡើយ តែរដ្ឋាភិបាលបានបង្កើតពន្ធប្រភេទនេះ នៅក្នុងច្បាប់ថវិកាជាតិ តាំងឆ្នាំ២០១០ មកម្ល៉េះ ហើយឱ្យអនុវត្តការយកពន្ធនេះនៅក្នុង ឆ្នាំ២០២០។ ប៉ុន្តែ ដោយសារត្រូវការពេលវេលាផ្សព្វផ្សាយឱ្យបានទូលំទូលាយ ដល់អ្នកមានជាប់កាតព្វកិច្ចបង់ពន្ធនេះ រាជរដ្ឋាភិបាលសម្រេចពន្យារពេលអនុវត្តនៅដើមឆ្នាំ២០២១។
ក្នុងនោះផងដែរ បន្ទាប់មានការប្រកាស ព័ត៌មានចេញព្រោងព្រាត បងប្អូនមួយចំនួន ហាក់មានមន្ទិលសង្ស័យ ពីការប្រមូលពន្ធនេះ ដោយអ្នកខ្លះបានលើកឡើងថា តើអចលនទ្រព្យដែលមិនច្បាស់លាស់ថ្លៃដើម តើត្រូវគិតពន្ធលើប្រាក់ចំណេញយ៉ាងម៉េច មានវិធីសាស្រ្ដអ្វីខ្លះ?
ឆ្លើយតបទៅកាន់សំណួរនេះ ឯកឧត្តម កែន សម្បត្តិ អគ្គនាយករង នៃអគ្គនាយកដ្ឋានពន្ធដារបានគូសបញ្ជាក់នៅក្នុងកិច្ចសម្ភាសន៍មួយ ដែលរៀបរៀងដោយអគ្គនាយកដ្ឋានពន្ធដារបានបញ្ជាក់ថា «ករណី ថ្លៃដើមឬក៏ថ្លៃទិញអចលនទ្រព្យ ទិញយូរហើយមិនបានរក្សាទុកឯកសារឬវិក័យប័តអីទេ គឺយើងអាចប្រើប្រាស់វិធីចំណាយតាមការកំណត់ ដោយឱ្យម្ចាស់ដើមទទួលបាន៨០% ហើយសល់២០% យកមកគណនា និង២០% បង់ពន្ធលើប្រាក់ចំណេញ» ។
ជាឧទាហរណ៍ បើអ្នកលក់ផ្ទះ១ខ្នងបានក្នុងតម្លៃ ១លានដុល្លារ នោះ នឹងរដ្ឋនឹងយកតម្លៃ ២០% នៃតម្លៃផ្ទះនោះ មកគិតពន្ធ ២០% ដែលបានកំណត់ ដូច្នេះ បើអ្នកលក់ផ្ទះនោះ បានក្នុងតម្លៃ១លានដុល្លារ នោះអ្នកនឹងត្រូវបង់ពន្ធចំណេញមូលធននេះ ៤ម៉ឺនដុល្លារ។
លោកក៏បានបញ្ជាក់ផងដែរថា ក៏គិតពន្ធនេះ ខាតក៏អាចថាបាន តែមិនគិតពន្ធទេ តែត្រូវមានឯកសារជាក់ស្ដែង ដែលគាំទ្រអាចទទួលយកបាន។ ដូច្នេះមានន័យថា ពន្ធចំណេញមូលធន ២០% លើការលក់អចលនវត្ថុនេះ នឹងត្រូវប្រមូលតែក្នុងករណីប្រតិបត្តិការលក់អចលនវត្ថុណា ដែលទទួលបានប្រាក់ចំណេញតែប៉ុណ្ណោះ ប៉ុន្តែបើក្នុងករណីប្រតិបត្តិការលក់អចលនវត្ថុណា ដែលមិនទទួលបានប្រាក់ចំណេញនោះ នឹងមិនជាប់កាតព្វកិច្ចពន្ធនេះឡើយ។
ឯកឧត្តម កែន សម្បត្តិ បានបញ្ជាក់បន្ថែមទៀតថា រាជរដ្ឋាភិបាល ក៏នឹងមានការលើកលែងផងដែរ ចំពោះការលក់ ឬផ្ទេរទ្រព្យមួយចំនួនដូចជា ប្រភេទទ្រព្យដែលជាកម្មសិទ្ធិស្ថាប័នរដ្ឋ ទ្រព្យដែលកម្មសិទ្ធិបេសកកម្មការទូតបរទេស ឬកុងស៊ុលបរទេស និង អង្គការអន្តរជាតិ ឬទីភ្នាក់ងារប្រតិបត្តិការបច្ចេកទេស នៃរដ្ឋាភិបាលដទៃ និងនិវាសដ្ឋានដែលជាគោលដើមរបស់អ្នកជាប់ពន្ធដែលបានកាន់កាប់ និងរស់នៅរយៈពេល៥ឆ្នាំ ក៏នឹងទទួលបានការលើកលែងពន្ធនេះដែរ ប៉ុន្ដែលើកលែងតែសម្រាប់ការលក់អចលនវត្ថុទីមួយប៉ុណ្ណោះ មិនអាចអនុវត្តចំពោះការលក់អចលនវត្ថុទី២ ឬ ទី៣នោះទេ។ ចំពោះការផ្ទេរអចលនទ្រព្យរវាងសាច់ញាតិដែលមានការលើកលែងនៅក្នុងពន្ធប្រថាប់ត្រា នោះក៏នឹងទទួលបានការលើកលែងលើពន្ធលើចំណេញមូលធននេះផងដែរ ដូចជាការទទួលសិទ្ធិ ឬសិទ្ធិកាន់កាប់ពីសាច់ញាតិរវាងឪពុក- ម្តាយបង្កើត និងកូនបង្កើត រវាងប្តី និងប្រពន្ធ និង រវាងយាយ-តាបង្កើត និងចៅបង្កើតជាដើម។
By: Bonny From: https://www.business-cambodia.com
