ទើបភ្ជាប់ពាក្យហើយ នាំគូដណ្តឹងដើរលេងកម្សាន្ត បែរជាជួបគ្រោះទៅវិញ
ខេត្តស្ទឹងត្រែង ៖ បើតាមសេចក្តីរាយការណ៍បឋមបានឱ្យដឹងថា នារីវ័យក្មេងម្នាក់ត្រូវបានប្រទះឃើញអណ្តែតនៅលើផ្ទៃទឹក ក្រោយពីបាត់ទៅក្នុងអន្លុងជម្រៅជាង២០ម៉ែត្រ នៅតំបន់រមណីយដ្ឋានកោះខេ ក្នុងសង្កាត់សាមគ្គី ក្រុងស្ទឹងត្រែង មួយយប់កាលពីរសៀលថ្ងៃទី២២ ខែកុម្ភៈ ឆ្នាំ២០២០។
សេចក្តីរាយការណ៍បន្តថា ជនរងគ្រោះខាងលើឈ្មោះ លី ស្រីនាត ភេទស្រី អាយុ២៤ឆ្នាំមានទីលំនៅភូមិសន្សំកុសល់ សង្កាត់បឹងទំពុន ខណ្ឌមានជ័យ រាជធានីភ្នំពេញ មុខរបរធ្វើការនៅក្រុមហ៊ុនទេសចរណ៍។
យោងតាមការឱ្យដឹងពីអភិបាលរងខេត្ត លោក ញ៉ែម សារីគ្រា បានចុះអន្តរាគមន៍ស្វែងរកជនរងគ្រោះនោះ កាលពីព្រឹកថ្ងៃទី២៣ ខែកុម្ភៈនេះ លោកបានបញ្ជាក់ថា នារីដែលជាជនរងគ្រោះ រួមជាមួយគូដណ្តឹង និងមិត្តភិក្តម្នាក់ទៀត បានធ្វើដំណើររួមគ្នាមកពីភ្នំពេញទៅលេងនៅខេត្តសៀមរាប រួចបន្តមកខេត្តព្រះវិហារ ហើយបានយកមិត្តភក្តិម្នាក់សរុប៤នាក់បន្តដំណើរមកកំសាន្តខេត្តស្ទឹងត្រែង។
លោកអភិបាលរងបន្តថា បន្ទាប់ពីដល់ខេត្តស្ទឹងត្រែងនៅវេលាថ្ងៃត្រង់ ពួកគេក៏បានមកកំសាន្ត និងញ៉ាំអាហារនៅរមណីយដ្ឋានកោះខេ រួចក៏ចុះលេងទឹក និងដើរថតរូបលើខ្សាច់ក្បែរអន្លុង តែជាអកុសលពេលនោះស្រាប់តែស្រុតដីខ្សាច់ធ្លាក់ទៅក្នុងអន្លុងបាត់តែម្តង។
លោកបន្តថា ក្រោយពីទទួលព័ត៌មានថា មានភ្ញៀវទេសចរណ៍លង់ទឹកនៅតំបន់រមណីយដ្ឋាន អាជ្ញាធររួមមានភូមិ-សង្កាត់-ក្រុង និងស្ថាប័នមន្ទីរពាក់ព័ន្ធ ព្រមទាំងសមត្ថកិច្ចសហគមន៍មូលដ្ឋានខិតខំស្វែងរកជនរងគ្រោះ ព្រមទាំងទំនាក់ទំនងទៅក្រុមគ្រួសារសាច់ញាតិផងដែរ។
ក្រោយពេលស្វែងរកជនរងគ្រោះមួយយប់ទល់ភ្លឺ នៅព្រឹកថ្ងៃទី២៣ កុម្ភៈនេះ អាជ្ញាធរក៏បានរកអ្នកជំនាញជុចទឹកពីទីរួមខេត្ត ដើម្បីជុចរកបន្ត លុះរហូតនៅម៉ោង៩និង៥០នាទីព្រឹក ថ្ងៃទី២៣ កុម្ភ: ទើបរកឃើញ។
យោងតាមការបំភ្លឺរបស់ក្រុមគ្រួសារសាច់ញាតិថា នារីរងគ្រោះខាងលើ ទើបនឹងភ្ជាប់ពាក្យជាមួយគូដណ្តឹងកន្លងទៅថ្មីៗនេះទេ ហើយពួកគេក៏ឆ្លៀតពេលនាំគ្នាដើរកំសាន្ត តែបែរជាមកជួបគ្រោះអកុសលបែបនេះសោះ។
បន្ទាប់នារីរងគ្រោះត្រូវបានប្រទះឃើញវិញ អាជ្ញាធរខេត្តស្ទឹងត្រែង ក៏បានបញ្ជាទៅមន្ទីរសុខាភិបាលរៀបចំរថយន្តសង្គ្រោះមន្ទីរពេទ្យបង្អែកខេត្តដឹកសពត្រឡប់ទៅភ្នំពេញឱ្យគ្រួសារធ្វើបុណ្យតាមប្រពៃណី។
ទាក់ទិននឹងការបាត់បង់ជីវិតរបស់នារីរងគ្រោះដែលជាភ្ញៀវទេសចរណ៍ម្នាក់ បណ្តាលមកពីការលង់ទឹកកាលរសៀលថ្ងៃទី២២ កុម្ភៈ នោះ លោក មាន សុខគឿន អនុប្រធានមន្ទីរទេសចរណ៍ខេត្តស្ទឹងត្រែង បានបញ្ជាក់ថា ជារើយៗ មន្ទីរបានអញ្ជើញអ្នកគ្រប់គ្រង់ទៅទទួលការផ្តល់នូវបច្ចេកទេស ដើម្បីគ្រប់គ្រងពីតំបន់ និងចំណុចណាដែលអាចឱ្យភ្ញៀវលេងបាន និងរៀបចំជាសញ្ញាស្លាកសំគាល់តំបន់ និងចំណុចណាដែលមិនអាចឱ្យភ្ញៀវចុះលេងបាន តែពួកគាត់ធ្វេសប្រហែសនូវបច្ចេសទេស ហើយការរៀបចំនៅមានកំរិត។ លោកបន្តថា មន្ទីរនឹងរឹតបណ្តឹងលើប្រព័ន្ធសុវត្ថិភាព និងណែនាំដល់ទីតាំងរមណីយដ្ឋានបន្ថែមទៀត ដើម្បីឆ្លើយតបទៅនឹងសុវត្ថិភាពទីកំសាន្ត៕
អត្ថបទ៖ https://kohsantepheapdaily.com.kh/
