ប្រទេស ៤០ នៅអាហ្រ្វិកអះអាងថា មានករណីឆ្លងកូវីដ ១៩ ចំនួន ១ ១១៤ នាក់
ក្រុងអាដឌីស អាបាបា៖ មជ្ឈមណ្ឌលគ្រប់គ្រង និងបង្ការជំងឺឆ្លងអាហ្វ្រិក (Africa CDC) បានបង្ហាញកាលពីថ្ងៃសៅរ៍ថា ចំនួននៃករណីកូវីដ ១៩ នៅទូទាំងទ្វីបអាហ្រ្វិកបានឡើងដល់ ១ ១១៤ ករណី ខណៈប្រទេសអាហ្វ្រិកចំនួន ៤០ បានរាយការណ៍ពីករណីឆ្លងជំងឺនេះកាលពីរសៀលថ្ងៃសៅរ៍។
លោក អាម៉េដ អូវ៉ែល អនុប្រធាន CDC អាហ្វ្រិកបានបញ្ជាក់ប្រាប់សារព័ត៌មានស៊ីនហួកាលពីល្ងាចថ្ងៃសៅរ៍ថា ប្រទេសអាហ្វ្រិកចំនួន ៤០ បានរាយការណ៍ថា មានករណីឆ្លងកូវីដ ១៩ ចំនួន ១ ១១៤ នាក់ ខណៈចំនួនអ្នកស្លាប់បណ្តាលមកពីជំងឺនេះ បានឡើងដល់ ២៨ នាក់នៅទូទាំងទ្វីបអាហ្វ្រិកក្នុងរយៈពេលនេះ។
យោងតាមអនុប្រធាន CDC បានឲ្យដឹងថា ចំនួនករណីដែលត្រូវបានបញ្ជាក់អះអាងនោះ គឺករណីឆ្លងថ្មីជិត ១០០ ករណី កាលពីថ្ងៃសៅរ៍ ដែលប្រទេសអាហ្វ្រិកចំនួន ៣៩ បានរាយការណ៍ករណីឆ្លងចំនួន ១ ០២១ ត្រឹមព្រឹកថ្ងៃសៅរ៍ ដោយបានធ្វើកំណត់ត្រាករណីថ្មីប្រហែល ៩៣ ករណី ត្រឹមរសៀលថ្ងៃសៅរ៍។
ដោយទទួលបានចំនួនអ្នកស្លាប់ថ្មី ៥ នាក់ ដោយសារការរាតត្បាតកូវីដ ១៩ ពី CDC អាហ្វ្រិកកាលពីព្រឹកថ្ងៃសៅរ៍ថែមលើចំនួនអ្នកស្លាប់ ២៣ នាក់មុននោះ ដូច្នេះធ្វើឲ្យចំនួនស្លាប់សរុប បានឡើងដល់ ២៨ នាក់ គិតត្រឹមរសៀលថ្ងៃសៅរ៍។
លោក អូវ៉ែល ក៏បានបញ្ជាក់ថាទ្វីបអាហ្រ្វិកស្ថិតក្នុងដំណាក់កាលផ្ទុះកូវីដ ១៩ ដំបូង ខណៈលោកសង្កត់ធ្ងន់ថា អត្រានៃការរាតត្បាតនៃកូវីដ ១៩ នៅអាហ្វ្រិកត្រូវការ «វិធានការឆាប់រហ័ស» ដើម្បីបញ្ឈប់ការរាលដាលជំងឺនេះ៕
អត្ថបទ៖ https://www.postkhmer.com/
