មកដឹងពីមូលដ្ឋានគ្រឹះរបស់ Hacker ដែលគ្រប់គ្នាមិននឹកស្មានដល់
តើអ្នកចង់ក្លាយខ្លួនជា Ethical Hacker ត្រូវធ្វើដូចម្តេចខ្លះ?នេះជាសំណួរដែលខ្ញុំទទួលបានពីសហគមន៍។ ដោយសារមានតម្រូវការច្រើននៅក្នុងទីផ្សារ មិនមែនគ្រប់គ្នាសុទ្ធតែអាចធ្វើបានតាមការចង់នោះទេ។
ក្នុងទំព័រហ្វេសបុក លោក អ៊ូ ផាន់ណារិទ្ធ អ្នកជំនាញប្រព័ន្ធសុវត្ថិភាពសន្តិសុខអ៊ឺនធើណិតបានពន្យល់ដល់សិស្សនិស្សិត ដើម្បីក្លាយជា Hacker ដំបូងត្រូវយល់ដឹងអំពីទស្សនទាន (concept) Hacker។ ការប្រើប្រាស់នូវកម្មវិធីដែលមានស្រាប់ៗ គឺមិនអាចក្លាយទៅជាអ្នកវាយប្រហារ (Hacker) បានឡើយ។
ការសិក្សាអំពីវិធីសាស្ត្រនៃ hacking គឺមិនងាយស្រួលឡើយ តែបើសិនអ្នកមានចំណាប់អារម្មណ៍ខ្លាំង អ្នកអាចសិក្សាបានលឿន។ តើអ្នកត្រូវចាប់ផ្ដើមយ៉ាងដូចម្ដេច ក្នុងការសិក្សាអំពី HACKING វាអាស្រ័យទៅលើខ្លួនអ្នក។ លោកបញ្ជាក់។
លោកបានបង្ហាញពីជំហានខ្លះៗ ដើម្បីក្លាយខ្លួនទៅជាអ្នកវាយប្រហារ។
- #១ – សិក្សារាល់មូលដ្ឋានគ្រឹះនៃកុំព្យូទ័រ (ចាប់ផ្ដើមពីប្រតិបត្តិការ តើវាដំណើរការយ៉ាងដូចម្តេច?
- #២ – សិក្សាអំពីមូលដ្ឋានគ្រឹះនៃបណ្ដាញ (network)
- #៣ – សិក្សាទៅលើប្រព័ន្ធប្រតិបត្តិការឲ្យបានច្រើនជាងមួយ (ដូចជា Linux ជាដើម)
- #៤ – ចាប់ផ្ដើមសិក្សាអំពីការសរសេរកម្មវិធី (ចាប់ផ្តើមជាមួយនឹង C Programming)
- #៥ – រៀន PHP សម្រាប់ការវាយប្រហារទៅលើវិបសាយ (វាក៏ជួយអ្នកក្នុងការអភិវឌ្ឍន៍វិបសាយផងដែរ)
- #៦ – សិក្សាភាសាសរសេរកម្មវិធីផ្សេងៗទៀត (Java, C++, C#,…)
- #៧ – សិក្សាអំពី Scripting language (JavaScript, Phyton,…)
- #៨ – អានរាល់ព័ត៌មាននៃការវាយប្រហារថ្មីៗ ដឹងអំពីពាក្យថ្មីៗ ដឹងអំពីមេរោគថ្មីៗ
- #៩ – យ៉ាងហោចណាស់ ធ្វើការមុខកុំព្យូទ័រពី ៥ ទៅ ៦ម៉ោងក្នុង១ថ្ងៃ
- #១០ – ព្យាយាមយល់ដឹងថាតើ hacking tool ធ្វើការងារយ៉ាងដូចម្ដេច?
- #១១ – ព្យាយាមបង្កើតកម្មវិធីដោយខ្លួនឯង ដោយប្រើប្រាស់ Phyton ឬភាសាផ្សេងៗទៀត
- #១២ – ស្វែងរកនូវចំណុចខ្សោយថ្មីៗនៅក្នុងវិបសាយ
- #១៣ – ជាពិសេសគឺ រៀនអំពីវិធីសាស្ត្រការពារខ្លួន
- #១៤ – អនុវត្តន៍ឲ្យបានច្រើន។
លោកបានបន្ថែមថា បើសិនជាអ្នកមិនមានចំណេះដឹងអំពីសន្តិសុខផ្ទាល់ (own security) ខ្លួននោះទេ ចូរកុំព្យាយាមធ្វើការវាយប្រហារឲ្យសោះ វាគឺជាហានិភ័យខ្ពស់ណាស់៕
អត្ថបទ៖ http://news.sabay.com.kh/
