មន្ត្រីយោធាម្នាក់បាញ់បងថ្លៃ៣គ្រាប់ ក្រោយចូលឃាត់ក្នុងទំនាស់គ្រួសារ
រាជធានីភ្នំពេញ ៖ មន្ត្រីយោធាម្នាក់បានដកកាំភ្លើងបាញ់បងថ្លៃចំនួន៣គ្រាប់ បណ្តាលអោយរងរបួសធ្ងន់ត្រូវបានក្រុមគ្រួសារបញ្ជូនទៅសង្គ្រោះនៅមន្ទីរពេទ្យកាល់មែត ដោយសារតែខឹងជនរងគ្រោះចូលឃាត់ ក្នុងទំនាស់ប្តីប្រពន្ធ ។
ហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោង៤និង៥០នាទីរសៀលថ្ងៃទី២៩ ខែកុម្ភៈ ឆ្នាំ២០២០ នៅចំណុចផ្ទះលេខT១៤ ផ្លូវបេតុង ក្រុមទី១ ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ។
ជនរងគ្រោះឈ្មោះ ប៊ន តុលា ភេទប្រុស អាយុ៣២ឆ្នាំ ជាកម្មករសំណង់ មានទីលំនៅកន្លែងកើតហេតុ រងរបួស៣គ្រាប់ត្រូវដៃ ត្រគាកខាងឆ្វេង និងខ្នង ។ ចំណែកជនបង្ករឈ្មោះ រស់ សូឌី ភេទប្រុស អាយុ៤៨ឆ្នាំជាមន្ត្រីយោធាថ្នាក់អនុសេនីយ៍ឯក បានគេចខ្លួនបាត់។
តាមប្រភពព័ត៌មានបានអោយដឹងថា នៅមុនពេលកើតហេតុ មន្ត្រីយោធារូបនោះមានទំនាស់គ្នាជាមួយប្រពន្ធ តែគេពុំដឹងថា មានទំនាស់រឿងអ្វីនោះទេ ។ បន្ទាប់ពីមានទំនាស់គ្នា ជនរងគ្រោះដែលជាបងថ្លៃ(បងប្រុសបង្កើតរបស់ប្រពន្ធជនដៃដល់) ក៏បានចូលទៅឃាត់ ហើយប្អូនថ្លៃខឹងក៏ដកកាំភ្លើងខ្លីបាញ់ចំនួន៣គ្រាប់ បណ្តាលអោយត្រូវទាំង៣គ្រាប់ រងរបួសធ្ងន់ ចំណែកជនដៃដល់បានរត់គេចខ្លួនបាត់។
តាមប្រភពព័ត៌មានបានឱ្យដឹងថា ភ្លាមៗនោះ ជនរងគ្រោះត្រូវបានក្រុមគ្រួសារបញ្ជូនទៅកាន់មន្ទីរពេទ្យកាល់មែតដើម្បីសង្គ្រោះ ។ បន្ទាប់ពីផ្ទុះអាវុធ នគរបាលក៏បានចុះទៅកន្លែងកើតហេតុ ដោយសារតែជនបង្កជាមន្ត្រីយោធា ក៏បានប្រគល់ករណីនេះអោយកងរាជអាវុធហត្ថខណ្ឌជាអ្នកស្រាវជ្រាវ ដើម្បីឃាត់ខ្លួនជនបង្កយកមកចាត់ការតាមច្បាប់៕
អត្ថបទ៖ https://kohsantepheapdaily.com.kh/
