រុស្ស៊ី​មិន​បាន​​បង្ហាញ​ខ្លួន​នៅ​ក្នុង​សវនាការ​តុលាការ​អន្តរជាតិ​ ​ពាក់​ព័ន្ធ​នឹង​ជម្លោះ​​អ៊ុយក្រែន

រុស្ស៊ី​ បាន​ខកខាន​មិន​បង្ហាញ​វត្តមាន​នៅ​ក្នុង​សវនាការ​ដ៏​សំខាន់​មួយ​នៅ​ឯ​តុលាការ​អន្តរជាតិ ដែល​មាន​គោល​បំណង​បញ្ឈប់ការ​ប្រយុទ្ធ​គ្នា​តាមរយៈ​ផ្លូវ​ច្បាប់ ដែល​ការ​ប្រយុទ្ធ​នេះ​បង្កើត​ឲ្យ​មាន​វិបត្តិ​ជនភៀស​ខ្លួនដ៏​ធំ​បំផុត​ក្នុង​ទ្វីប​អឺរ៉ុប​ក្នុង​រយៈ​ពេល​ជា​ច្រើន​ឆ្នាំកន្លង​ទៅ។ បញ្ហា​ដែល​ស្ថិត​ក្នុងសំណុំ​រឿង​នេះ ​គឺការ​អះអាង​របស់​ប្រធានាធិបតី​រុស្ស៊ី Vladimir Putin អំពី​អំពើ​ប្រល័យ​ពូជសាសន៍ ដែល​លោក​បាន​យក​មក​ធ្វើ​ជា​ហេតុ​ផល​សំអាង​ដើម្បី​ឈ្លានពាន​ប្រទេសអ៊ុយក្រែន។

កៅអីដែល​ត្រូវ​បាន​ត្រៀម​ទុក​សម្រាប់​ក្រុម​អ្នក​ច្បាប់​រុស្ស៊ី​នៅ​ទំនេរ​ នៅ​ឯ​តុលាការ​យុត្តិធម៌​អន្តរជាតិ។ អវត្តមាន​របស់ភាគី​រុស្ស៊ី នៅ​ក្នុង​សវនាការ​នេះ​ ​ បានផ្ដល់​ប្រៀប​យ៉ាង​ខ្លាំងទៅ​ឲ្យ​ប្រេសិត​មក​ពី​ភាគី​អ៊ុយក្រែន គឺ​លោក Anton Korynevych ដែល​បាន​លើក​ឡើង​សំអាង​ហេតុ​ជា​ច្រើន​ដើម្បីការពារ​ប្រទេស​របស់​លោក​ ប្រឆាំង​នឹង​ទីក្រុង​មូស្គូ នៅ​ឯ​ស្ថាប័នតុលាការដែល​មាន​មូលដ្ឋាន​នៅ​ក្នុងទីក្រង​ឡាអេ​មួយ​នេះ។

លោក ​បាន​ថ្លែង​ដូច្នេះ​ថា៖ «ការ​ដែល​ភាគីរុស្ស៊ី​អវត្តមាន​នៅ​ពេល​នេះ វា​ជា​ការ​បញ្ចាក់យ៉ាង​ច្បាស់​មួយ។ ពួក​គេ​មិន​ចូលរួម​ក្នុងតុលាការ​តាម​ផ្លូវ​ច្បាប់​នោះ​ទេ មាន​ន័យ​ថា​ ពួកគេ​កំពុង​ជាប់​ដៃ​ធ្វើ​សង្គ្រាម​នៅ​ឯ​សមរភូមិ​ ប្រឆាំង​នឹង​ប្រទេស​របស់​ខ្ញុំ»។

តុលាការ​យុត្តិធម៌​អន្តរជាតិ គឺ​ជា​តុលាការ​ជាន់​ខ្ពស់​បំផុត​សម្រាប់​ដោះស្រាយ​ជម្លោះ​តាម​ផ្លូវ​ច្បាប់ រវាង​រដ្ឋ​និង​រដ្ឋ។ ប្រទេស​រុស្ស៊ី ត្រូវ​គេ​រំពឹង​ថា​នឹង​ដាក់​បង្ហាញនូវអំណះ​អំណាងរបស់​ខ្លួន​កាលថ្ងៃ​អង្គារ ប៉ុន្តែ​ពួក​គេ​មិន​បាន​ធ្វើ​ដូច្នេះ​ទេ។ ប្រទេស​រុស្ស៊ី​មិន​បាន​ចូលរួម​ក្នុងសវនាការ​នេះ​ទេ​ ​កាល​ពី​ថ្ងៃ​ចន្ទ។

ប្រធានាធិបតី​រុស្ស៊ី​លោក​ Vladimir Putin បាន​អះអាង​ថា លោក​បាន​ឈ្លានពាន​អ៊ុយក្រែន​ដើម្បី​ការពារ​ពលរដ្ឋ​ដែល​ទទួល​រង​ការ​រំលោភបំពាន និង​អំពើ​ប្រល័យ​ពូជសាសន៍ នៅ​ភាគ​ខាង​កើត​នៃ​ប្រទេស​អ៊ុយក្រែន។ ទាំង​រុស្ស៊ី និង​អ៊ុយក្រែន​ គឺ​ជា​ប្រទេស​ដែល​បាន​ចុះ​ហត្ថលេខា​លើ​សន្ធិសញ្ញា​ស្ដីពី​អំពើ​ប្រល័យ​ពូជសាសន៍​អន្តរជាតិ។ អ្នក​ឯកទេស​ខាង​អំពើ​ប្រល័យ​ពូជសាសន៍​បាន​ថ្លែង​ថា ការ​អះអាង​របស់​លោក​ Putin គឺជា​ការ​អះអាង​ដែល​គ្មាន​មូលដ្ឋាន​ត្រឹមត្រូវ ហើយ​ស្មាក្ដី​ជនជាតិ​បារាំង​ដែល​ការពារ​ក្ដី​ឲ្យ​ភាគី​រុស្ស៊ី បាន​លាឈប់​ និង​បាន​ចោទ​ប្រកាន់​ទីក្រុង​មូស្គូ​ថា បាន​រំលោភ​ច្បាប់។

ប្រភព÷ VOA

ទៀន​ត្រូវ​គេ​ដាក់​នៅ​លើ​ស្មៅ​ដោយ​មាន​សរសេរ​ថា «លោក Putin ចេញ​មក» នៅ​មុខ​តុលាការ​ឧក្រិដ្ឋកម្ម​អន្តរជាតិ​ក្នុង​ទី​ក្រុង​ឡាអេ​ប្រទេស​ហូឡង់ កាល​ពី​ថ្ងៃ​ច័ន្ទ​ទី​៧ ខែ​មីនា ឆ្នាំ​២០២២
Book Bus Ticket Online With LankrongTicket.com Book Bus Ticket Online