សភារបស់អ៊ីរ៉ាក់ អនុម័តសេចក្តីព្រាងច្បាប់មួយ ស្នើសុំឲ្យរដ្ឋាភិបាលបញ្ចប់វត្តមានកងកម្លាំងបរទេស នៅអ៊ីរ៉ាក់
ក្រុងបាកដាដៈ សភាអ៊ីរ៉ាក់កាលពីថ្ងៃអាទិត្យបានអនុម័តសេចក្តីព្រាងច្បាប់មួយដែលតម្រូវឲ្យរដ្ឋាភិបាលបញ្ចប់វត្តមានកងកម្លាំងបរទេសនៅក្នុងប្រទេស អ៊ីរ៉ាក់ និង ទប់ស្កាត់មិនឲ្យពួកគេប្រើប្រាស់ ដែនអាកាស និងដែនទឹករបស់អ៊ីរ៉ាក់ជាដាច់ខាត។
នៅក្នុងកិច្ចប្រជុំវិសាមញ្ញមួយក្រុមសមាជិកសភាបានបោះឆ្នោតដោយមានសំឡេងភាគច្រើននៅក្នុងការយល់ព្រមឲ្យអនុម័តច្បាប់មួយដែលតម្រូវឲ្យរដ្ឋាភិបាលលុបចោល សំណើសុំជំនួយពីក្រុមចម្រុះអន្តរជាតិ ដើម្បីវាយប្រហារក្រុមរដ្ឋអ៊ិស្លាម (IS) គ្រោងបញ្ចប់ប្រតិបត្តិការយោធា និងសង្គ្រាមនៅប្រទេសអ៊ីរ៉ាក់។
យោងតាមការសម្រេចចិត្តរបស់សភាបានឲ្យដឹងថា៖ «រដ្ឋាភិបាលអ៊ីរ៉ាក់ គួរធ្វើការបញ្ចប់វត្តមានរបស់កងកម្លាំងបរទេសណាមួយនៅក្នុងទឹកដី និងទប់ស្កាត់ពួកគេមិនឲ្យប្រើប្រាស់ដែនអាកាសអ៊ីរ៉ាក់ដើម្បីហេតុផលណាមួយនៅក្នុងប្រទេសមួយនេះ»។
បន្ថែមពីនេះ រដ្ឋាភិបាលអ៊ីរ៉ាក់បានតំណាងដោយរដ្ឋមន្ត្រីការបរទេសគួរតែ «ដាក់ពាក្យបណ្តឹងប្រឆាំងអាមេរិក ជុំវិញការរំលោភបំពានរបស់ខ្លួនទៅលើអធិបតេយ្យភាព និងសន្តិសុខអ៊ីរ៉ាក់»។
នាយករដ្ឋមន្ត្រីបណ្តោះអាសន្នអ៊ីរ៉ាក់លោក អាឌែលអាប់ឌុល ម៉ាហ៍ឌី បានចូលរួមប្រជុំសភាដែលបានចាក់ផ្សាយតាមទូរទស្សន៍ ហើយបានថ្លែងសុន្ទរកថាទៅកាន់ក្រុមសមាជិកសភាដោយបានថ្លែងថា៖ «ការបណ្តេញកងកម្លាំងអាមេរិកចេញពីអ៊ីរ៉ាក់នឹងត្រូវបានគិតពីផលប្រយោជន៍របស់អ៊ីរ៉ាក់ និងអាមេរិកផងដែរ ជាពិសេសក្រោយពីមានហេតុការណ៍វិវត្តចុងក្រោយនេះ»។
ប្រជាជនអ៊ីរ៉ាក់សែងមឈូសចំអកឡកឡឺយ ខណៈពួកគេដង្ហែក្បួននៅក្នុងចលនាបុណ្យសពឥស្សរជនជាន់ខ្ពស់លោក អាប៊ូ ម៉ាហ៍ឌី អាល់មូហានឌីស។ AFP
កិច្ចប្រជុំសភាបានធ្វើឡើង ២ ថ្ងៃក្រោយពីអាមេរិកបានវាយប្រហារដ្រូនទៅលើក្បួនរថយន្តយោធាមួយនៅព្រលានយន្តហោះទីក្រុងបាកដាដដែលបានសម្លាប់លោក ហ្គាស៊ី សូឡេម៉ានី ជាមេបញ្ជាការរបស់កងកម្លាំងការពារបដិវត្តន៍អ៊ីរ៉ង់ និងលោក អាប៊ូម៉ាហ៍ឌី អាល់មូហានឌីស ជាមេបញ្ជាការរងរបស់ក្រុមកងកម្លាំងយោធាប៉ារ៉ាហាស់ដ៍ ស្សាអាប៊ីនៅអ៊ីរ៉ង់។
ក្រោយពីវាយប្រហារព្រលានយន្តហោះនោះ លោក អាប់ឌុល ម៉ាហ៍ឌី បានអំពាវនាវឲ្យសភាបើកកិច្ចប្រជុំវិសាមញ្ញមួយ ដើម្បីកែសម្រួលតំណែងមន្ត្រីអ៊ីរ៉ាក់ និងធ្វើការសម្រេចចិត្តតាក់តែងច្បាប់ដ៏ចាំបាច់ដែលនឹងរក្សាសេចក្តីថ្លៃថ្នូរ ការពារសន្តិសុខ និងអធិបតេយ្យភាពរបស់អ៊ីរ៉ាក់។
យោធា US ជាង ៥០០០ នាក់ត្រូវបានដាក់ពង្រាយនៅអ៊ីរ៉ាក់ ដើម្បីគាំទ្រកងកម្លាំងអ៊ីរ៉ាក់នៅក្នុងការប្រយុទ្ធប្រឆាំងក្រុម IS ជាពិសេសផ្តល់ការបណ្តុះបណ្តាល៕
ប្រភព៖ https://www.postkhmer.com/
