សម្ដេចតេជោ៖ ការដកម៉ាសចេញ នឹងបង្កើតបរិយាកាសសប្បាយរីករាយសម្រាប់បងប្អូនប្រជាពលរដ្ឋ

ជាមួយនឹងការចូលរួមអរសាទរដល់ប្រជាពលរដ្ឋដែលថ្ងៃនេះនឹងបាន​រំដោះខ្លួន​ចេញពី​ម៉ាស់​នោះ ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានមាន​ប្រសាសន៍ថា នេះ គឺជាការចង់បានរបស់ប្រជាពលរដ្ឋរបស់យើង ហើយក៏ជាការចង់បានរបស់រាជរដ្ឋាភិបាល ដើម្បីចូលរួមការសន្សំសំចៃ​របស់ប្រជាពលរដ្ឋ។

ក្នុងសារពិសេសជាសំឡេងនាព្រឹកថ្ងៃទី ២៦ ខែមេសា ឆ្នាំ២០២២ ជូនជនរួមជាតិ សម្ដេចតេជោមានប្រសាសន៍សង្ឃឹមថា ការដកម៉ាសចេញ នឹងបង្កើតបរិយាកាសសប្បារីករាយសម្រាប់បងប្អូនប្រជាពលរដ្ឋរបស់យើង ហើយក៏នឹងចូលរួម​ចំណែកទៅលើការសន្សំសំចៃក្នុងការប្រើប្រាស់ ដោយផ្ទេរការចំណាយពីការទិញម៉ាសមកពាក់បង្វែរទៅជាការទិញម្ហូប​អាហារ ទិញសម្លៀកបំពាក់ឱ្យកូនចៅ និងទុកសន្សំប្រាក់កាសនោះ ដើម្បីប្រើប្រាស់ទៅលើគោលដៅផ្សេង។

ប៉ុន្តែសម្ដេចតេជោ ក៏នូវតែអំពាវនាវឱ្យរក្សាទុកម៉ាស់ជាប់និងខ្លួន នៅពេលដែលចូលដល់កន្លែងដែលចាំបាច់ត្រូវពាក់​ម៉ាសដូចបានកំណត់ ដែលក្រសួងសុខាភិបាល និងផ្នែកពាក់ព័ន្ធនឹងរៀបចំវិធានការបញ្ជាក់ទៅតាមក្រោយ ថាកន្លែងណា​ដែលត្រូវពាក់ និងកន្លែងណាដែលមិនត្រូវពាក់ គឺទីកន្លែងដែលបិទជិតរបៀបណា នោះ ហើយបើសិនជាទីកន្លែងដែល​បិទជិតនោះគេមិនបើកម៉ាស៊ីនត្រជាក់ ប៉ុន្តែគេបើកបង្អួចគឺអាចចាត់ទុកថា ជាការរំដោះខ្លួនចេញពីការពាក់ម៉ាស់​ថែម​ទៀត។

សម្ដេចតេជោ បានចូលរួមអបអរសាទរ និងថ្លែងអំណរគុណចំពោះប្រជាពលរដ្ឋ ដែលក្នុងរយៈកាលកន្លងទៅបានចូលរួម​យ៉ាងសកម្ម គាំទ្រទៅដល់វិធានការទាំងឡាយដែលរាជរដ្ឋាភិបាលដាក់ចេញ តាមរយៈក្រសួងសុខាភិបាលក្ដីតាមរយៈ​អាជ្ញាធរថ្នាក់ក្រោមជាតិក្ដី តាមរយៈសារសំឡេងរបស់សម្ដេច ជូនប្រជាពលរដ្ឋក្ដី ហើយដោយសារតែ​កិច្ចសហប្រតិបត្តិការ និងការ ចូលរួមរបស់ប្រជាពលរដ្ឋនេះហើយ ដែលធ្វើឱ្យប្រទេសរបស់យើងមានភាពធូរ ស្រាល។

សម្ដេចតេជោនាយករដ្ឋមន្ត្រីក៏បានឱ្យដឹងដែរថា ថ្ងៃនេះនៅទូទាំងព្រះរាជាណា ចក្រកម្ពុជា មានអ្នកឆ្លងជំងឺកូវីដ-១៩ ត្រឹមតែចំនួន០២នាក់ប៉ុណ្ណោះ ដែលនេះជាព្រឹត្តិការណ៍មិនធ្លាប់មាន ហើយជាលើកដំបូងនៅក្នុងប្រវត្តិជាងមួយឆ្នាំ នៅក្នុង​រាជធានីភ្នំពេញពុំមានឆ្លងនោះទេ សម្រាប់ថ្ងៃទី២៥ ខែមេសា ឆ្នាំ២០២២កាលពីម្សិលមិញ។ នេះគឺជារឿងដែល​គួរឱ្យត្រេក​អរជាមួយនឹងការចូលរួមរបស់ប្រជាពលរដ្ឋ និងការខិតខំប្រឹងប្រែងរបស់ស្ថាប័នមានសមត្ថកិច្ច ជាពិសេស​ក្រុមគ្រូពេទ្យ​ក៏ដូចជាផ្នែកពាក់ព័ន្ធនានា ដែលបានយកចិត្តទុកដាក់ចូលរួមអនុវត្តន៍នូវវិធានការទាំងនេះ៕

Book Bus Ticket Online With LankrongTicket.com Book Bus Ticket Online