សេចក្តីបំភ្លឺជូនមហាជនចំពោះផេកហ្វេសប៊ុកឈ្មោះ(ហាងលក់ទូរស័ព្ទដៃនិងIpad)
ខេត្តបាត់ដំបងៈក្រុមការងារប្រតិកម្មរហ័សនៃស្នងការដ្ឋាននគរបាលខេត្តបាត់ដំបងមានកិត្តិយសសូមជម្រាបជូនសាធារណៈ ជនពិសេសបងប្អូនដែលនិយមប្រើប្រាស់បណ្តាញសង្គមបានជ្រាបថាក្នុងមួយរយៈពេលថ្មីៗនេះមានបងប្អូន អ្នកប្រើប្រាស់បណ្តាញសង្គមមួយចំនួនបានបញ្ជូនខ្លឹមសារចូលក្នុងប្រអប់សំបុត្រផេកហ្វេសប៊ុកផ្លូវការរបស់ស្នងការដ្ឋាន InboxPageដែលក្នុងនោះបានសាកសួររកទីតាំងហាងលក់ទូរស័ព្ទដៃមួយកន្លែងដែលមានម្ចាស់ផេកហ្វេស ប៊ុកមួយ Facebook Page ដោយសរសេរឈ្មោះទីតាំងនោះថា(ហាងលក់ទូរស័ព្ទដៃនិងIpad)ព្រមទាំងភ្ជាប់ដោយការសរសេរប្រាប់អតិថិជនថា ទីតាំងរបស់គាត់នោះស្ថិតនៅផ្ទះលេខ 6789E ខេត្តបាត់ដំបង ជិតសាលារៀន២ធ្នូ។
ក្រៅពីការសាកសួររកទីតាំងនេះបងប្អូនប្រជាពលរដ្ឋទាំងនោះសុទ្ធតែបានបង្ហាញនូវក្តីរងគ្រោះដែលបានបង្ក ឡើងដោយម្ចាស់ផេកហ្វេសប៊ុក Facebook Page ខាងលើដោយការដាក់ប្រកាសលក់ទូរស័ព្ទដៃនិងIpad ប៉ុន្តែពេលអតិថិជនទិញហើយផ្ញើប្រាក់ឱ្យគាត់ទៅមុនប៉ុន្តែអតិថិជនមិនបានទទួល(ទំនិញ) នោះមកឱ្យទេហើយថែមទាំង(បិទ)ការទំនាក់ទំនងជាមួយទៀតផងឬទូរស័ព្ទចូលតែមិនព្រមទទួល ។
ក្រោយពេលទទួលបាននូវព័ត៌មាននេះនិងដោយបានការអនុញ្ញាតពី ឯកឧត្តម ឧត្តមសេនីយ៍ទោ អ៊ុច សុខុន ស្នង ការនៃស្នងការដ្ឋាននគរបាលខេត្តបាត់ដំបង ក្រុមការងារប្រតិកម្មរហ័សបានធ្វើការស្រាវជ្រាវជាបន្ទាន់លើបញ្ហានេះដែលក្នុងនោះបានធ្វើការទំនាក់ទំនងទៅកាន់លេខទូរស័ព្ទដែលបានដាក់ក្នុងនោះផង តែមិនមានអ្នកទទួល សោះជាមួយគ្នានេះលោកនាយប៉ុស្តិ៍នគរបាលរដ្ឋបាលស្វាយប៉ោ នៃអធិការដ្ឋាននគរបាលក្រុងបាត់ដំបង បានចុះទៅដល់ទីតាំងដែលបានដាក់បង្ហាញនៅក្នុងផេក Page ខាងលើ ហើយបានបញ្ជាក់ថាសាលារៀន២ធ្នូមានទីតាំងស្ថិតនៅក្នុងភូមិកំពង់ក្របី សង្កាត់ស្វាយប៉ោ ក្រុងបាត់ដំបង ខេត្តបាត់ដំបង តែមិនមានទីតាំងលក់ទូរស័ព្ទដូចក្នុងរូបភាពដែលម្ចាស់ផេក Page ខាងលើបានបង្ហោះនោះទេ ។ ម៉្យាងទៀតនៅខាងក្រោមដែលដាក់អាស័យដ្ឋានផ្ទះលេខ 6789E នោះលោក មៀន សុផល មេភូមិកំពង់ក្របី សង្កាត់ស្វាយប៉ោ បានបញ្ជាក់ថា នៅក្នុងមូលដ្ឋានភូមិកំពង់ក្របីរបស់លោកលេខផ្ទះប្រជាពលរដ្ឋក្នុងមួយភូមិមានត្រឹមតែជាង៥០០គ្រួសារតែប៉ុណ្ណោះ រីឯលេខផ្ទះ6789Eដែលម្ចាស់ផេកហ្វេសប៊ុកផ្សព្វផ្សាយខាងលើនោះគឺពុំមានឡើយ ។
ឆ្លងតាមរយៈការស្រាវជ្រាវមួយរយៈពេលនេះយើង សូមធ្វើការវាយតម្លៃនិងសន្និដ្ឋានបានថា នៅជិតសាលារៀន២ធ្នូ ក្នុងភូមិកំពង់ក្របីសង្កាត់ស្វាយប៉ោ ក្រុងបាត់ដំបង ខេត្តបាត់ដំបងមិនមានហាងលក់ទូរស័ព្ទដៃឈ្មោះ(ហាងលក់ទូរស័ព្ទដៃនិងIpad)និងមិនមានផ្ទះលេខ 6789E នោះទេ។
ដូចបានជម្រាបជូនខាងលើ សូមសាធារណៈជនពិសេសបងប្អូននៅក្នុងបណ្តាញសង្គមមេត្តាជ្រាប ហើយម៉្យាងទៀតសូមអំពាវនាវដល់បងប្អូនប្រជាពលរដ្ឋដែលទទួលរងគ្រោះដោយម្ចាស់ផេកហ្វេសប៊ុកខាងលើទៅដាក់ពាក្យ បណ្តឹងជាលាយលក័្ខអក្សរនៅទីកន្លែងសមត្ថកិច្ចនគរបាលដែលស្ថិតក្នុងមូលដ្ឋានដែលកំពង់រស់នៅដើម្បីសមត្ថកិច្ចលោកមានមូលដ្ឋានក្នុងការចាត់វិធានការស្រាវជ្រាវស៊ើបអង្កេតជាផ្លូវការលើករណីនោះ មួយវិញទៀតយើងខ្ញុំក៏សូមជម្រាបបញ្ជាក់ជូនម្ចាស់ផេកហ្វេសប៊ុកខាងលើ បានជ្រាបថាសមត្ថកិច្ចនគរបាលនៃស្នងការដ្ឋាននគរបាលខេត្តបាត់ដំបង មិនទាន់បាន ធ្វើការចោទប្រកាន់ចំពោះម្ចាស់ផេកខាងលើអំពីអំពើល្មើសច្បាប់ណាមួយនៅឡើយទេ អ្វីជាការលើកបង្ហាញពីខាងដើមគឺជាការដកស្រង់នូវមតិយោបល់របស់បងប្អូនដែលបានបញ្ជូនខ្លឹមសារមកយើងខ្ញុំតែប៉ុណ្ណោះករណីម្ចាស់ផេកហ្វេសប៊ុកខាងលើបានឃើញនូវព័ត៌មាននេះសូមមេត្តាអញ្ជើញចេញមកបកស្រាយបំភ្លឺជូនសាធារណៈជនបានជ្រាបពីការពិតនិងភាពត្រឹមត្រូវរបស់ខ្លួនក្នុងនោះដែរប្រសិនបើករណីដែលបានលើកឡើងដោយអ្នកប្រើប្រាស់បណ្តាញ សង្គមដែលថាពួកគាត់ជាជនរងគ្រោះ ក៏ជាការជូនដំណឹងដល់មហាជនគ្រប់មជ្ឈដ្ឋានមេត្តាមានការប្រុងប្រយ័ត្នចំពោះករណីល្មើសច្បាប់ដែលកើតឡើងដោយការ(ទិញ-លក់)សម្ភារៈវត្ថុតាមរយៈប្រព័ន្ធអនឡាញOnlineនេះ ដោយសេចក្តីគោរពរាបអានបំផុត៕(ក្រុមការងាប្រតិកម្មរហ័ស)
