អូតង់៖ កងកម្លាំង​រុស្ស៊ី​ប្រហែល​ជា​មាន​ចេតនា​យក​ជនស៊ីវិល​ជា​គោលដៅ​វាយប្រហារ

អគ្គលេខធិកា​អង្គការ​អូតង់​លោក Jens Stoltenberg បាន​ថ្លែង​ថា កង​កម្លាំង​រុស្ស៊ី​ប្រហែល​ជា​វាយ​ប្រហារ​លើ​ជន​ស៊ីវិល​ដោយ​ចេតនា ខណៈ​ជន​ស៊ីវិល​ទាំង​នោះ​ព្យាយាម​រត់​ភៀសខ្លួន​ពី​ការ​វាយ​ប្រហារ​ដោយ​យោធារុស្ស៊ី​នៅ​អ៊ុយក្រែន។

លោក Stoltenberg ​បាន​ថ្លែង​នៅ​ថ្ងៃ​អង្គារ​ថា៖ «មាន​សេចក្តី​រាយការណ៍​ដ៏​គួរ​ឲ្យ​ជឿ​ទុក​ចិត្ត​បាន​ស្តី​អំពី​ជន​ស៊ីវិល​ដែល​រង​ការ​បាញ់​ប្រហារ នៅ​ពេល​ពួកគេ​ព្យាយាម​រត់​គេច​ខ្លួន។ ការ​បាញ់​ប្រហារ​លើ​ជន​ស៊ីវិល​គឺជា​ឧក្រិដ្ឋកម្ម​សង្គ្រាម​ ហើយ​វា​រឿង​ដែល​មិន​អាច​ទទួល​យក​បាន​ជា​ដាច់​ខាត»។

អគ្គលេខាធិការ​អង្គការ​អូតង់​រូប​នេះ​បាន​ប្រាប់​ក្រុម​អ្នក​សារព័ត៌មាន​នៅ​​ប្រទេស​ឡេតូនី​ថា សង្គ្រាម​ដែល​មាន​រយៈ​ពេល​ជាង​ពីរ​សប្តាហ៍​នៅ​ក្នុង​ប្រទេស​អ៊ុយក្រែន​ បង្ក​ជា​ផល​ប៉ះពាល់​មនុស្ស​ធម៌ «ដ៏​ធ្ងន់ធ្ងរ»។

លោក​ថ្លែង​ថា៖ «យើង​ចាំបាច់​ត្រូវ​មាន​ច្រក​ភៀសខ្លួន​មនុស្ស​ធម៌​ដែល​[ភាគី​ទាំង​អស់​] ត្រូវ​តែ​គោរព​តាម​ឲ្យ​បាន​ពេញលេញ»។

នៅ​ពេល​ត្រូវបាន​សួរ​ថា​តើ​អង្គការ​អូតង់​អាច​ធ្វើ​អ្វី​បាន​ដើម្បី​ជួយ​ដល់​បញ្ហា​នេះ លោក Stoltenberg បាន​ថ្លែង​ថា៖ «យើង​មាន​ការ​ទទួល​ខុស​ត្រូវ​ដើម្បី​ធានា​ថា ជម្លោះ​នេះ​មិន​រីករាលដាល​ហួស​ពី​ព្រំដែន​អ៊ុយក្រែន​ឡើយ»។

បច្ចុប្បន្ន​នេះ អង្គការ​អូតង់​កំពុង​បង្កើន​កម្លាំង​យោធា​របស់​ខ្លួន​ដើម្បី​ធានា​ថា​ប្រទេស​ជា​សមាជិក​អូតង់​ដែល​នៅ​ក្បែរ​ប្រទេស​រុស្ស៊ី និង​អ៊ុយក្រែន មិន​ក្លាយ​ជា​គោលដៅ​វាយ​ប្រហារ​បន្ទាប់​របស់​​រុស្ស៊ី៕

ប្រភព÷VOA

Book Bus Ticket Online With LankrongTicket.com Book Bus Ticket Online