អ្នកតវ៉ាលីបង់ ព្យាយាមរាំងខ្ទប់មិនឲ្យបោះឆ្នោតសម្តែងការទុកចិត្ត
ក្រុងបេរូត៖ ក្រុមអ្នកតវ៉ានៅក្នុងទីក្រុងបេរូត បានព្យាយាមរារាំងមិនឲ្យបោះឆ្នោតសម្តែងការទុកចិត្តនៅក្នុងសភាកាលពីថ្ងៃអង្គារ ដល់រដ្ឋាភិបាលថ្មីមួយ ដែលពួកគេបាននិយាយថា បានបរាជ័យក្នុងការដោះស្រាយចំពោះការទាមទារ និងមិនអាចជួយសង្គ្រោះវិបត្តិសេដ្ឋកិច្ចនៅលីបង់នោះ។
កងកម្លាំងសន្តិសុខបានប្រើប្រាស់ឧស្ម័នបង្ហូរទឹកភ្នែក និងកាណុងបាញ់ទឹក ដើម្បីបំបែកក្រុមបាតុករ ដែលបានគប់ដុំថ្មបំបែកជញ្ជាំងនៅជុំវិញសភានោះ។
កាកបាទក្រហមបានរាយការណ៍ថា មនុស្ស ២៤ នាក់ ត្រូវបានបញ្ជូនទៅកាន់មន្ទីរពេទ្យ និង ១៤៧ នាក់ផ្សេងទៀត បានព្យាបាលនៅកន្លែងតវ៉ា ទោះបីជាយោធាបានអំពាវនាវឲ្យធ្វើបាតុកម្មដោយសន្តិវិធីក្តី។
នៅមុនកិច្ចប្រជុំបានចាប់ផ្តើម ក្រុមអ្នកតវ៉ាបាននាំគ្នាឡោមព័ទ្ធបាញ់ថ្នាំពណ៌ទៅលើកញ្ចក់រថយន្តរបស់ក្រុមសមាជិកសភា ហើយបានគប់ដបទឹកទៅលើពួកគេក្នុងការព្យាយាម ដើម្បីបញ្ឈប់ពួកគេ មិនឲ្យចូលទៅក្នុងសភាដើម្បីបោះឆ្នោត។
ក្រុមបាតុករបានដណ្តប់ទង់ជាតិលីបង់ និងបានស្រែកពាក្យស្លោកថា «យើងគ្មានការជឿជាក់នោះទេ» ហើយពួកគេបានចាប់ផ្តើមប្រមូលផ្តុំគ្នានៅមុនពេលថ្ងៃរះ នៅកន្លែងខុសៗគ្នានៅជុំវិញរដ្ឋធានី ក្នុងការព្យាយាម ដើម្បីគេចពីកន្លែងត្រួតពិនិត្យរបស់ប៉ូលិស។
សមាជិកសភាខ្លះបានចំណាយពេលពេញមួយយប់នៅក្នុងសភា ដើម្បីទប់ស្កាត់ក្រុមអ្នកតវ៉ាដែលបានទទួលជោគជ័យក្នុងការរារាំងកិច្ចប្រជុំមួយចំនួន ចាប់តាំងពីពួកគេបានធ្វើយុទ្ធនាការកាលពីខែតុលា ឆ្នាំ ២០១៩។
អ្នកតវ៉ាម្នាក់ គឺអ្នកស្រីការូលីនិយាយថា៖ «ខ្ញុំនៅទីនេះ គ្មានទំនុកចិត្តទៅលើរដ្ឋាភិបាលទេ ដោយសារវិធីដែលបង្កើតឡើងមិនត្រូវគេទុកចិត្ត»៕
អត្ថបទ៖ https://www.postkhmer.com/
