ពលករឆ្លងដែនខុសច្បាប់ចំនួន ២៦នាក់ ត្រូវបានឃាត់ខ្លួនដោយកម្លាំងកងការពារព្រំដែនលេខ៥០៣

ពលករឆ្លងដែនខុសច្បាប់ ត្រូវបានកម្លាំងកងការពារព្រំដែនលេខ ៥០៣ ឃាត់ខ្លួនបានកាលពីថ្ងៃទី១៦ ខែកញ្ញា ឆ្នាំ២០២១ កន្លងទៅនេះ វេលាម៉ោង ១២:០៥នាទី រហូតដល់ ម៉ោង ១៦:០០នាទីល្ងាច ខណៈពេលដែលពួកគេកំពុងដឹកនាំពលករឆ្លង ដែនទៅប្រទេសថៃ ឃាត់បាន ២ករណី៖

-ករណីទី១ ឃាត់បានចំនួន ១៦នាក់ ក្នុងនោះស្រី ៩នាក់ ក្មេង ១នាក់ រថយន្ត ២គ្រឿង ១ម៉ាកកាម៉ារីពណ៌ខ្មៅ ពាក់ស្លាកលេខ ពោធិ៍សាត់ 2A 0206 ម្ចាស់រថយន្តគេចខ្លួនបាត់ ២ម៉ាកកាម៉ារីពណ៌ខៀវ ពាក់ស្លាកលេខ កំពុងចាម 2A 0521 ម្ចាស់រថយន្តពីរនាក់ប្តីប្រពន្ធ ចំណែកម្ចាស់ និងរថយន្ត បានប្រគល់ជូនកងរាជអាវុធហត្ថខេត្តបន្ទាយមានជ័យ ។

-ករណីទី២ ឃាត់បានចំនួន ១០នាក់ ក្នុងនោះស្រី ២នាក់ ក្មេង ១នាក់ គោយន្តកន្ត្រៃ ១គ្រឿង និងម្ចាស់ប្រគល់ជូនកងរាជអាវុធ ហត្ថខេត្តបន្ទាយមានជ័យ ចំណែកគោយន្តរក្សាទុកនៅអង្គភាព។ ហើយឃាត់ខ្លួនបានត្រង់ភូមិសាស្ត្រភូមិចក់ពួក ឃុំស្លក្រាម ស្រុកស្វាយចេក ខេត្តបន្ទាយមានជ័យ ។

សូមបញ្ចាក់ថា៖ ក្រោមការយកចិត្តទុកដាក់ដឹកនាំបញ្ជារផ្ទាល់របស់ លោកឧត្តមសេនីយ៍ត្រី ឃួន ជឿន មេបញ្ជាការកងការពារព្រំដែនលេខ ៥០៣ ចាត់តាំង លោកវរសេនីយ៍ទោ លេ លឿត មេបញ្ជាការរងកងការពារព្រំដែនលេខ៥០៣ ដឹកនាំកម្លាំងចំនួន ២៥នាក់ ល្បាតនិងពួនស្ទាក់ចាប់បានពលករលួចឆ្លងដែនខុសច្បាប់ ។ លោកបានដឹកនាំកម្លាំងល្បាត២៤ម៉ោងលើ២៤ម៉ោង ដោយប្តូរវេនគ្នា ដើម្បីទប់ស្កាត់ពលករលួចឆ្លងដែនខុសច្បាប់ និងទប់ស្កាត់ការឆ្លងរាលដាល នៃជំងឺកូវីដ-១៩ មិនឲ្យចូលទៅក្នុងសហគមន៍៕