សិង្ហបុរីទទួលបានសិទ្ធិធ្វើម្ចាស់ផ្ទះពានរង្វាន់ AFF SUZUKI CUP 2020

CAMSOC-ភ្នំពេញ៖ សហព័ន្ធកីឡាបាល់ទាត់​​អាស៊ី​អាគ្នេយ៍ (AFF) បាន​សម្រេច​ផ្ដល់​សិទ្ធិឲ្យ​ប្រ​ទេស​សិង្ហបុរី ធ្វើ​ម្ចាស់​​ផ្ទះ​ការ​​ប្រ​កួត​បាល់​ទាត់​ជើង​ឯក​អាស៊ី​អាគ្នេយ៍ AFF SUZUKI CUP 2020 ជា​ផ្លូវ​ការ​ហើយ ខណៈ​ការ​ប្រ​កួត នឹង​ចាប់​ផ្ដើម​ពី​ថ្ងៃទី០៥ ខែធ្នូ ឆ្នាំ២០២១ ដល់​ថ្ងៃទី០១ ខែមករា ឆ្នាំ២០២២ ខាងមុខ។

ការផ្ដល់សិទ្ធិឲ្យសិង្ហបុរីធ្វើម្ចាស់ផ្ទះនេះ ធ្វើឡើង​ក្រោយ​កិច្ចប្រ​ជុំ​ពិ​ភាក្សា និង​ការសម្រេច​របស់ AFF បន្ទាប់​ពី​មាន​បេក្ខ​ភាព ៥​ប្រ​ទេស បាន​ដាក់​ពាក្យ​ស្នើ​ធ្វើ​ម្ចាស់​ផ្ទះ​ព្រឹត្តិ​ការណ៍​បាល់​ទាត់​ជើង​ឯក​អា​ស៊ាន​នេះ រួម​មាន​កម្ពុជា វៀតណាម ឥណ្ឌូនេស៊ី ថៃ និងសិង្ហបុរី។

គួរដឹងថាការប្រកួត AFF SUZUKI CUP 2020 នេះ បាន​ចាប់​ឆ្នោត​បែង​ចែក​ពូល​រួច​ហើយដោយកម្ពុជា ស្ថិតក្នុងពូល B ជាមួយវៀតណាម ម៉ាឡេស៊ី ឥណ្ឌូនេស៊ី និងឡាវ។ រីឯពូល A គឺមានម្ចាស់ផ្ទះសិង្ហបុរី ថៃ មីយ៉ាន់ម៉ា ហ្វីលីពីន និងក្រុមឡើងមកពីវគ្គជម្រុះ រវាងប្រ៊ុយណេ និងទីម័រខាងកើត៕