U-23 មីយ៉ាន់ម៉ា ដកខ្លួនពីពាន AFF U23 Championship 2022 បន្ទាប់​ពី​មាន​កី​ឡា​ករ​មួយ​ចំនួន​វិជ្ជ​មាន​កូវីដ-១៩

CAMSOC-ភ្នំពេញ៖ សហព័ន្ធកីឡាបាល់ទាត់មីយ៉ាន់ម៉ា (MFF) បាន​ជូន​ដំណឹង​ដល់​សហព័ន្ធ​កី​ឡា​បាល់​ទាត់​អាស៊ាន (AFF) នៅ​ថ្ងៃនេះ​ថា ពួកគេ​បាន​ដក​ខ្លួន​ចេញ​ពី​ពាន​រង្វាន់ AFF U23 Championship 2022 ដោយ​សារ​ផល​វិបាក​នៃ​ជំងឺ​កូវីដ-១៩។

ជាផ្នែកមួយនៃវិធានការសុខភាព និងសុវត្ថិភាពសម្រាប់ការប្រកួត​ដែល​កំពុង​ដំណើរ​ការ U23 មីយ៉ាន់ម៉ា បានឆ្លងកាត់ការធ្វើតេស្តជាប្រចាំមុន និង​ក្រោយ​ពេលមកដល់កម្ពុជា។ បន្ទាប់​ពី​ការ​បញ្ជាក់​​ពីការធ្វើតេស្តវិជ្ជមាន​ក្នុង​ចំណោមកីឡាករមួយចំនួន ការសម្រេចចិត្តមួយត្រូវបានធ្វើឡើង​ដោយ​មីយ៉ាន់ម៉ា ដោយប្រកាសដកក្រុមរបស់ខ្លួនចេញពីការប្រកួត ដើម្បី​ជួយ​កាត់​បន្ថយ​​ហានិ​ភ័យនៃការឆ្លងបន្ថែមទៀត។ កីឡាករ និង​បុគ្គលិក​ដែលត្រូវ​បាន​គេកំណត់ថា ជាអ្នកមានទំនាក់ទំនងជិតស្និទ្ធក៏ត្រូវបានដាក់ឱ្យ​នៅ​ដាច់​ដោយឡែកផងដែរ។

ឯកឧត្តម ខៀវ សាម៉េត ប្រធានសហព័ន្ធកីឡា​បាល់ទាត់អាស៊ាន (AFF) មានប្រសាសន៍ថា “ពិត​ជា​ការ​សោក​ស្តាយ​យ៉ាងខ្លាំង ដែលក្រុម U23 មីយ៉ាន់ម៉ា ដកខ្លួនចេញពីពានរង្វាន់ AFF U23 Championship។ ទោះជាយ៉ាងណាក៏ដោយ សុខភាព និងសុវត្ថិភាពរបស់អ្នកគ្រប់គ្នាដែលពាក់ព័ន្ធ គឺមានសារសំខាន់បំផុត ហើយយើងយល់ច្បាស់អំពីការសម្រេចចិត្តដែលបានធ្វើឡើង។ យើងសូមជូនពរសមាជិកដែលរងផលប៉ះពាល់ បានជាសះស្បើយពេញលេញ និងឆាប់រហ័ស»។

ដេីមឡេីយមីយ៉ាន់ម៉ា គ្រោងនឹងចាប់ផ្តើមយុទ្ធនាការរបស់ពួកគេក្នុងពូល B នៅថ្ងៃទី ១៥ ខែកុម្ភៈ នេះ ទល់នឹងម៉ាឡេស៊ី។ ស្របពេល​កាល​វិភាគ​ប្រកួត ដែលត្រូវកែសម្រួល​ នឹងត្រូវប្រកាស​ក្នុង​ពេល​ឆាប់ៗ​នេះ៕

ប្រភព៖ aseanfootball

Book Bus Ticket Online With LankrongTicket.com Book Bus Ticket Online